Arianespace e Evropës ka lëshuar raketën e fundit Vega, duke e vendosur satelitin Sentinel-2C në orbitë nën programin Copernicus të Bashkimit Evropian për të monitoruar mjedisin e Tokës.

Raketa u hodh në hapsirë nga një bazë lëshimi në Guajanën Franceze.

Nisja i jep fund një karriere 12-vjeçare për mjetin e vogël lëshues, të projektuar nga Avio e Italisë. Ai po zëvendësohet nga Vega C i përditësuar, i cili do të rikthehet në shërbim më vonë këtë vit pas një dështimi në procesin e lëshimit në dhjetor 2022.

I ndërtuar nga Airbus Defense & Space, Sentinel-2C do të zëvendësojë Sentinel-2A, i cili është pjesë e një çifti satelitësh që operojnë brenda programit Copernicus.

Ai do të përdoret për të studiuar shpyllëzimin, zhvillimin urban dhe emergjencat si zjarret në pyje, përmbytjet ose shpërthimet vullkanike, tha kreu i njësisë Copernicus në Komisionin Evropian.

Agjencia Evropiane e Hapësirës, ​​e cila është partnere e BE-së në projekt, ka thënë se Copernicus është projekti më i madh i monitorimit mjedisor në botë.

Së bashku, gjashtë familjet e satelitëve Sentinel të programit synojnë të lexojnë “shenjat vitale” të planetit nga dioksidi i karbonit deri te lartësia e valëve ose temperaturat e tokës dhe oqeaneve.

Sipas SCAN TV

/ rtsh.al /