Pas 7 vitesh punë, Komisionit të Pavarur të Kualifikimit i kanë mbetur për të kaluar në sitë edhe vetëm 6 prokurorë e gjyqtarë, nga 805 magjistratë që pati për detyrë t’u kontrollonte pasurinë, figurinë dhe profesionalizmin.

Nga Shkurti i 2018 deri në 11 Tetor 2024, KPK, ndryshe Shkalla e Parë e Procesit të Vetingut konfirmoi 368 prokurorë, gjyqtarë e ndihmësa ligjor dhe shkarkoi, 267.

Bashkë me këta të fundit, nga sistemi u larguan përfundimisht edhe 105 prokurorë e gjyqtarë të tjerë që zgjodhën të jepnin dorëheqjen duke refuzuar të përballen me vetingun. Kështu, sistemit iu krijuan 273 vakanca.

Ndërkohë, KPK dërgoi sërish në shkollën e Magjistraturës 2 prokurorë për probleme me profesionalizmin dhe pushoi ose doli pa vendim përfundimtar për 57 prokurorë e gjyqtarë të cilët kishin paqartësi nëse e mbanin ende statusin e magjistratit.

Në Maj të 2020-ës, SPAK njoftoi se kishte marrë nën hetim 10 ish-gjyqtarë të Gjykatës së Lartë dhe Kushtetueses me bazë vendimet e tyre të shkarkimit nga KPK.

Për 5 prej tyre, Gjykata e Posaçme ka dhënë vendime dënimi, ka sekuestruar pasurinë, apo është duke i gjykuar për mosdeklarim të pasurisë. KPK përfundon mandatin në Dhjetor të këtij viti.

/rtsh.al/